مفتی تقی عثمانی

محبت کیا ہے دل کا درد سے معمور ہوجانا

متاعِ جاں کسی کو سونپ کر مجبور ہوجانا

قدم ہےراہِ الفت میں تو منزل کی ہوَس کیسی

یہاں تو عین منزل ہے تھکن سے چور ہوجانا

یہاں تو سر سے پہلے دل کا سودا شرط ہے یارو!

کوئی آسان ہے کیا سرمد و منصور ہوجانا

بسا لینا کسی کو دل میں دل ہی کا کلیجا ہے

پہاڑوں کو تو بس آتا ہے جل کر طور ہوجانا

نظر سے دور رہ کر بھی تقیؔ وہ پاس ہے میرے

کہ میری عاشقی کو عیب ہے مہجور ہوجانا

مفتی تقی عثمانی